Frétt Morgunblaðsins 12.12.2002, um nýjan vopna- og sprengjuleitarbúnað frá Heimann í Þýskalandi, sem Smith & Norland umbýður og hefur nýverið verið afhentur:

Nýr sprengjuleitarbúnaður í notkun á Keflavíkurflugvelli

Nýtt öryggis- og sprengjuleitarkerfi vegna sprengjuleitar í farangri verður tekið í notkun í Flugstöð Leifs Eiríkssonar um næstu áramót. Mun þetta einn fullkomnasti öryggisbúnaður af þessu tagi sem völ er á í heiminum.

Búnaðurinn, sem kostar um 210 milljónir kr., er hálfsjálfvirkur og tengdur gegnumlýsingarvél sem skynjar sjálf farangur sem þarfnast frekari skoðunar vegna öryggiseftirlits á flugvellinum.

Einnig hefur verið tekin í notkun á flugvellinum sérhönnuð bifreið af gerðinni Mercedes-Benz sem búin er sérstakri gegnumlýsingarvél vegna leitar í vöru- og póstsendingum sem fara um flugvöllinn.

Hið nýja öryggiskerfi var kynnt í gær og við það tækifæri undirritaði Halldór Ásgrímsson utanríkisráðherra endurskoðaða neyðaráætlun fyrir flugvöllinn. Þar er m.a. að finna nýja viðbragðsáætlun vegna sprengjuhótana, flugrána og mögulegra sýklavopna.