Í tengslum við félagsfund tannlækna sem haldin var á Akureyri laugardaginn 29. apríl s.l. bauð Smith & Norland hf. til kynningar á stafrænum röntgenbúnaði frá Sirona í Þýskalandi. Kynningin fór fram á tannlæknastofu Kristjáns Víkingssonar á Akureyri og var mæting góð af hálfu þeirra tannlækna sem fundinn sóttu.

Garðar Sigurðsson tannlæknir kynnti notkun búnaðarins sem hann festi nýverið kaup á, ásamt tannlæknasamstæðu og röntgentæki frá Sirona. Stafræni röntgenbúnaðurinn sem ber heitið SIDEXIS og samanstendur af hug- og vélbúnaði er sniðinn að þörfum hvers notanda fyrir sig. Garðar sýndi tannlæknum virkni búnaðarins með því að taka röntgenmyndir á stafrænan nema í munni sjúklings og nokkrum sekúndum síðar birtist viðkomandi röntgenmynd á tölvuskjá. Röntgenmyndin birtist í hugbúnaði SIDEXIS þ.s. Garðar sýndi þá möguleika sem í boði eru til að meðhöndla myndina þannig að betri greining fáist af viðkomandi mynd. Það er óhætt að segja að tannlæknar hafi almennt verið ánægðir með gæði röntgenmyndanna ásamt þeim möguleikum sem að hugbúnaður SIDEXIS býður við greiningu og geymslu. Hugbúnaðurinn inniheldur fullkominn gagnagrunn til að halda utan um allar röntgenmyndir sem teknar eru af viðkomandi sjúklingi og einnig býður hugbúnaðurinn upp á samtengingu við önnur sjúklingaforrit.

Með vönduðum tölvubúnaði frá Fujitsu Siemens Computers getur Smith & Norland hf. boðið tannlæknum heildarlausn á stafrænum röntgenbúnaði.

Í áratugi hefur Smith & Norland hf. boðið hágæða tannlæknabúnað frá Siemens AG í Þýskalandi. Sú deild fyrirtækisins varð að sjálfstæðu fyrirtæki undir heitinu Sirona Dental Systems GmbH árið 1998 og er eins og áður í Bensheim í Þýskalandi. Sirona mun áfram sem hingað til kappkosta að bjóða tæknilega fullkominn og vandaðan tannlæknabúnað á samkeppnishæfu verði.